هل فعلاً تم حجب اليوتوب في ليبيا ؟
يناير 24th, 2010 بواسطة Almo16
.:: السلام عليكم ::.
هل فعلاً تم حجب اليوتوب في ليبيا ؟
تفاجأت اليوم بأن موقع اليوتوب محجوب أو لا يفتح في ليبيا ، ولكن هل هذا صحيح ؟ هل تم حجب الموقع ؟ وإن كان صحيحاً ، فمن المسؤول ؟ وما هو السبب ؟ مثل هذه الاسئلة وهذه الأمور وجدتها في الكثير من المواقع والمدونات ، ولكن كل الحديث الذي يدور في هذه المواقع كلام ليس تقني ، فلا أعتقد أنه بإستطاعة الشركة الموقرة للإتصالات فعل هذا الأمر ، فلم أرى لديهم مهندسين يفقهون ما يفعلون ، بعد تعاملي المباشر معهم في تدوينة سابقة ، لم أجد لديهم مثل هذه الخبرة ، فأعتقد أن الخلل بالموقع خلل تقني وليس حجب للموقع ، وإلا لتم حجب وإقفال الـ Google والـ Gmail ، موقع شركة الإتصالات التقنية في ليبيا مقفل حالياً ، ولا أستطيع دخول حسابي ، وهذا خلل آخر من الشركة الموقرة ، لكم أتمنى أن تأتي شركة منافسة وليست بعربية ، لنرى الإمكانيات والتخفيضات والمفاجأت الدائمة ، في كل مناسبة سأتحدث عن هذه الشركة العريقة في التاريخ والسيئة في الخدمات ، فالأمر واضح وضوح الشمس ، ليس لديهم إمكانيات من ناحية الموارد البشرية ، وخدماتها من الممكن أن تكون تحسنت مؤخراً ، ولكنها لن تضاهي بعض الشركات في دول الجوار ، نلتقي في تدوينة آخرى
والله حتى فى ابوظبى سمعت قالو سكروه مش عارف شنو هى
القصهوربك يستر
حتى ولو كان رسمي حجب للموقع ، فحجب غبي ( و معاه سمايل شماته ) ، لأن الموقع يخدم ببساطة مع مواقع البروكسي ..
يلا نعيشوا ونشوفوا
.:: السلام عليكم ::.
أكيد بس مش كل حد يعرف يفتح ببروكسي ، وأني قاعد نقول أنه الغلط من الشركة الي مش غبية ههههههههه
هههههههههه … قالك فى واحد ليبي مشا للصين ..ناض الساعه عشرة الصبح .. شالوه جنازة .
مازالو راقدين … تبيلهم من يكب عليهم آميه (ماء) كان عباك على بن غزي يا قعادك فى الحوش….احلم
الليبين زي ماقال العمروني … نحنا انقولو سبحان الله بس
السلام عليكم …
.
سؤال هل انت عندك الخبرة التقنية ؟ حتى انى نقول في الشك عندك في رجليك , الحاجات التقنية هذه اللى تتكلم عليها مزال انت صغير عليها لما تكبر توا تفهمها بالشوية
سلام
.:: السلام عليكم ::.
يقولك تكلمت ، تسمع بيها ؟؟؟
شني معاهم ولا شني أنت لما حجبوه ، ولا مش محجوب برأيك ؟
هههههههههه كل واحد يفسر كيف ما يبي وكيف ما يريحه
معاك يا اخي واتمنى من كل المدونات الليبية اطلاق حملة كبيرة على هده الشركة الخايبة
.:: السلام عليكم ::.
بالفعل تم إطلاق حملة يا أخ مواطن ، ونحن بضدد تنظيم الكثير من الأمور في هذا الشان
فى الحقيقه أنا تفاجئت كذلك من يومين وسمعت من ضديق نفس الكلام انه اموقف من ايام ويقولو انو محجوب بس الحمد لله فى طرق بسيطه تقدر تدخل بيها عالموقع كما انا فعلت
توا انت طايح تلقح على الشركة وعلى الليبين يعني توا انت مش ليبي – والا بالك انت ماشاء الله تفهم وتعرف كل شيء وهي الشركة وموظفينها هم اللى مش عارفين شيء – تي ماهو كلنا ليبين ونعرفوا بعضنا – تي ماهو هو هدا الموجود والله غالب علينا – توا علاش طايح تلقح وتحشم فينا قدام البرانية – برا انت واياه اقروا واتعلموا وفكوكم ونورنا وقيموها بالبلاد وبدل ماتدشها على النت خلو ليبيا تمشي لقدام – مش شادينها يوتيوب وفيس بوك وتشات – فكونا من الحشايم راهو كلنا ليبين ونعرفوا بعضنا – والله حرقتولي دمي على الصبح -
اقسم بالله انتم مايعجبكم عجب و لا صيام في رجب, و توا نشوفوا لما يكون في منافس شن راح تقول يا صاحب الموضوع.
من ليبيا يأتي الجديد,,,
اصلا هادو لا يقرو و لايعرفوا يتعلموا الا معكسين لليوتيوب و المواقع التفهة و التشات ,,,,
شوف سلم ولدي برى دورلك على حاجة كويسة تدوي عليها احسنلك انت صايرلك زي الي شاد قربه منقوبة وتقطر عليه و صدقني انت الي مش عارف حاجة وهذا عيب الليبين انه انديروا روحنا نعرف و نقرارواو حني و الله ماعرفينها من وين زارقه تعرف اولا كان مش من الشركة هذه راهو انت ماعرفتاش الانترنت اساسا و الي يخدموا فيها النظاف فيها يساويك 10 مرات فلهذا دور حاجة على قدك تعرفها و تفاهمها ادوي فيها مش متخليش روحك مضحك للناس وربي يهديك ان شاء الله ومعلومة بالطبع موظفي الشركة عندهم وسعة بال يتعملوا حتى مع متخلفين عقليا شكلك
في واحد قالي الليبين زي الجمل اللى طاح في باسطي ماصدقوا ربي النت رخص وكتر بدوا 24 ساعة شادينها على النت ومدايرين روحهم فالحين – تي برا اقرا انت واياه سلم وليدي وفكك من جو المرضى هدا
اكل ومرعى واليتيوب صنعة اللي يلقح على الشركة وانها سكرت او فتحت خلاص معاش في شيء في النت الا اليوتيوب من وين عرفتو النت كان مش من الشركة هذه وانتم من لما فتحهولكم النت وعرفتوه بديتو ( جمل وطاح في يتيوب (باسطي)) مش متعودين معليش
السلام عليكم
مشكلة انه الممنوع مرغوب مش حتوقف الدنيه عند اليوا تيوم وعلي فكره خلي اسكروه لانه موقع يهودي اولا
وتانيا الشركة خيرها موفره كل شيئ عندك اكتر من وسيله للانترنت ومتحلمش بيها كنت عندك الاي دي اس ال و الواي مكس والدايلب / وعن طريق الريفي وعن طريق اليبيانا والمدار
وكان كل واحد ليبي يخاف علي بلاده مصارش فينا هكي زي المقاطع الي منزلينا خوتنا الليبين عارنا كله شفناه قولها ينزل حاجه حلوه للبلاد ايقولك شني
السلام عليكم
مشكلة انه الممنوع مرغوب مش حتوقف الدنيه عند اليوا تيوم وعلي فكره خلي اسكروه لانه موقع يهودي اولا
وتانيا الشركة خيرها موفره كل شيئ عندك اكتر من وسيله للانترنت ومتحلمش بيها كنت عندك الاي دي اس ال و الواي مكس والدايلب / وعن طريق الريفي وعن طريق اليبيانا والمدار
وكان كل واحد ليبي يخاف علي بلاده مصارش فينا هكي زي المقاطع الي منزلينا خوتنا الليبين عارنا كله شفناه قولها ينزل حاجه حلوه للبلاد ايقولك شني هدي ليبيا
يرحم الله والديك فعلا بدل ما نسترو بعضنا طلعو عار بعضنا عالدنيا كلها ياريت منا فينا لا حنى اللي تقول علينا اعداء بعضا يارب استرنا دنيا اخرة
زي اللي فيه هلبة كلام انقال عالشركة و عالليبيين غلط
عموما اليوتيوب حاجة تافهة وما تستاهلش لين نهزأ الليبيين على شانها
وبعدين خدمة الإنترنت في ليبيا رخيصة وممتازة
ولو كان حارقك اليوتيوب لهذه الدرجة تقدر تمشي تفتحه في تونس
سلامات
.:: السلام عليكم ::.
هههههههه لو بيفتحه في تونس الي يبيه اليوتوب فيه هلبة حاجات غير اليوتوب ، أما بالنسبة للي قال صاحب الموضوع يستر ومش عارف شني ، الكلام واضح ، ونبوا الحرية في التعبير ، والحرية في الرأي ، وأني بالنسبة ليا عندي موقعي الخاص بيا ومنتداي نقدر نكتب فيه شن نبي ، أما بخصوص اليوتيوب وما إلى ذلك فهو مجرد توسيع قاعدة شعبية فقط لا غير ….
الموضوع بي اختصار فيه واحد ايصلح وفيه عشرة ايفسدوا بسبب جهل بعض الناس
المفروض قبل ما تكتب اي موضوع تركز هل انتا متاكد منه وهل يسئ لي اي حد ولا لي بلادك
ولو معجبتكش بلادك خليها للي عاجباته
عيب تتكلم على شركة ليبيا للاتصالات بالشكل هذا وانت ما اتجيج حتى زبلة بحدى أصغر مهندس فيهم.
وأنشر كانك راجل ولد راجل
.:: السلام عليكم ::.
هههههه تي أنت تكلم محترم قبل وبعدين قولي أنشر ، أني منراقبش في الردود لعلمك والرد منشور طول هذا شئ
ثاني شئ يا حبوب ، أني مهندس حاسوب ، بكالوريوس برمجة وتحليل نظم ، غير المززززط ، بعدين أنت متعرفنيش باش تتكلم عليا
والي قال يسي لأحد أو يسئ لبلادي ، هادي بلادي وبلادك ، وأني ليبي ونفتخر أني ليبي ولو مركز علي اسم النطاق يحمل إسم ليبيا ، وليس Com ركز كويس وشوف وطنيتك قبل لا تتكلم علي وطنيتي
أني الحمد لله خادم البلاد أكثر مما أنت ومخيلتك الضعيفة تتصور ، ولله الحمد ، ومنرضى في بلادي شئ ، ولو يخلوني علي الشردمة الي فالقة البلاد ، فالحين غير في النهب والسرقة ومخليين الشباب ضايع ، ننهيهم ونعدمهم إعدام زي ما عدموا الوطنية في الناس الي زيك ، ليبيا بلادنا ونحبوها بخيرها وبشرها نبوها ونحبوها يا محترم
ركز علي الكلام بعدين تكلم ورد
الى كاتب المقال almo19او almo20اذا اعتبرناه مقال يااخى طالما هناك اناس مثلك من المفترض اننا لن نحتاج الى شركات ليست بعربية لتدير لنا شركاتنا .ماذا سنفعل بامثالك إذً؟؟؟؟ ,وجودك ووجود امثالك كتف ايدينا وجعلنا قاصرين على ادارة الشركة هههههه . كان عليك ان تبحث على موضوع اكثر افادة لك من موقع اليوتيوب المحجوب.
شكرا لكل الاخوة اللى علقو قبلى.
جدا شخص مش فاهم شن تقول – توا من جيهة تسب في الليبين ومن جيهة خادم وطنك – اعرف كيف تتكلم على بلادك وبعدين فكر كيف تخدم وطنك – اصلا اشكالك انت اللى مدمرين البلاد وهادمينها وداكينه في روس باقي الشعب – ربي يكون في عونك من نفسك
.:: السلام عليكم ::.
قد تحول النقاش من نقاط على الموضوع إلى نقاش بيزنطي
أنا هنا أتحدث عن شئ واضح ، عن حجب اليوتيوب ، وعن تكتيف بعض المواقع ، أما بخصوص البلاد ، ولو تبي تتكلم علي الصح خيرك متتكلمش علي السرقات الواضحة والمفضوحة ، خيرك متتكلمش علي الرصيد المحدود من هذه الشركة المحترمة ، خيرك متتكلمش علي كيفية التوزيع والبيع ، خيرك متتكلمش علي الموظفة الي تكلمت ، توة معقولة أنت في الحوش عاطيينك 7 جيجا زيك زي باقي المشتركين ؟ ولا تعبي أنت أصلا في رصيد ؟ خلونا من المزايدات والأمور الزايدة الي تجر في ليبيا للخلف ، شوفوا لقدام وخليكم وطنيين وخليكم ولاد وبنات بلاد ، مش ناس داكة راسها لوطة وتقول لا ميجيش … للحديث بقية
بالمناسبة لموقع اليوتيوب صح مسكراته شركة ليبيا لللاتصالات لان انى نخدم غادى وقالو انه اكتشفوه انه هوا اللى يخلى فى انت ضعيف ولكن لغباء الشركة مايعرفوش ان نص ليبيا غيرت الابي وفتحاته , والحمد لله هذا جهل من الادارة المشرفة فى شركة ليبيا للاتصالات والى الامام والفاتح ابدا
المشكلة فينا حني العرب ديما العيقاب جماعي
تو الواحد شن دنبه يستعمل الموقع في الترفيه
زي كورة زي موسيقا زي شروح على برامج
واحد يفسد على مية
هدا الي مخلينا التالي 1000 سنة
اللي يدري يدري واللي ما يدري يقول كف عدس
موظف في LTT الباين انه اذكى واحد فيهم مشاء الله واللهي
السلام عليكم …
انحب انعرف بعض الشباب ان المجود في شبك النت اكتر بكتير من اليوتوب حاول ان تفهم ملا تفهمه وتعرف مالا تعرفة جرب مرة واثنين وثلاثة عود نفسك على المطالعة واعرف الناس عن طريق علمهم والتعامل معهم في العلم والتبادل المعلومات .
والله عيب علينا ان نناقش في مواضيع تافه مثل هده احنا مزال اكبر من بكتير والله اكبر وعاشنا ليبيين احرار مسليمين تحت راية الاسلام .
LTT
لسنا الأفضل ولكننا وحدنا
كلكم شعابيط
اليوتوب ضربه الهكر ياااشباب ظلمتو شركتنا الطيبه
مع الاسف اليوتيوب لم يضربه الهكر بل حجب بس عادي جدااااا هناك حل هذاااا موقع يفتح الجميع المواقع غصب عن الكل هو..http://www.snoopblocker.com/ اكيد ميه ميه شوفوه ودعولي
وسعوا بالكم مع الراجل تي راهوا بكالوريس كمييوتر ماغير ….. وانتوا نازلين فيه على خاطر اللي يخدموا في ltt مهندسين زراعة ومرات ماهمش مكملين الاعدادية تي شنو تدهرز ياخونا وقالك جماعة مايقدروش يديروها خرف تي هو حتى انا واعوذ بالله من كامة انا نقدر نديرها وانامش مهندس كومبيوتر ولاحاجة بس مهندس ميكانيكا هالعلم ولا الذرة تحسابها انت
لكن مرات نقول الراجل كلامة حق حتى انا في العمل معانا قسم كبير متع حاسب الي فيه قريب 25 مهندس كومبيوتر وكالهم زي بعضهم ماعارفين شئ ومايديروا في شئ وطول النهار شادينها عاليوتيوب تقول النت مافيشى حاجة ثانية بكل والله تشمت فيهم لما انحجب وكان صارت مشكلة في واحد من الاجهزة عندنا كلهم يهربوا وراء الضحكة الصفراء والحل الوحيد عندهم الجهاز يبي تفوريم قداش ساهل الموضوع عندهم مايبوش تعبوا روحهم حتى شوية ويخششوا على قوقل ويبربشوا بكش يلقوا حل بسيط
توا احنى سيبناهم ومعاش نسئلوا فيهم بكل على حتي حاجة نحلوا في مشاكلنا بروحنا الشئ اللي يضحك ويبكي هم بدوا يسئلوا فينا حني الشهر الي فات في العمل جبنا منظومة جديدة وكلها لينوكس طبعا الموضوع فيه سيرفير ومجموعة كومبيوترات معاه وكلها راكب فيها وندووس بس لكن العباقرة اللي عندنا ما عرفوش يصبوا اللينوكس امري لله مشيت صبيتهلم وعرفتلهم الشبكة وبالمرة سخفوني مشيت فتحتلهم اليوتيوب
نتكلموا من الصبح علي جماعة الكومبيوتر اللي معاي في العمل و جماعة ltt وصاحبنا اللي نردوا عليه توا وكلهم بكالوريس كومبيوتر وشكلهم كلهم مايعرفوا شئ ولا متخرجين من مكان واحد مايقري في شئ
الحمد لله الواحد قري ميكانيكا واني اللي كنت زمان نبي نغير ونخش لقسم الحاسب كنهدا الواحد تو متكنطي من ltt ويدور كيف يخش لليوتيوب
.:: السلام عليكم ::.
ههههههههههههه يا مهندس الميكانيكا ، أني مش متكنطي لأنه أنحجب ولعلمك راجع التدوينة أهيه
http://16.com.ly/2010/01/google-dns/
فيها الحل لحجب اليوتيوب ، والطريقة اني داير الشرح متاعها باش الي ميعرفش يعرف كيف يفك الحجب
ههههههههههه ، معادش تحرق أعصابك لما ترد خليك كول